Que é a COMPOSTAXE?
A compostaxe é a maneira de converter os biorresiduos –que supoñen o 53% da bolsa do lixo municipal- nun produto fertilizante. Consiste nun proceso aerobio (con aire) e termófilo (con aumento de temperatura) no que están implicados organismos e microorganismos descompoñedores naturais e no que é necesario misturar residuos de cociña e xardín con restos leñosos e secos de podas, serraduras e follas, para producir unha emenda de elevada calidade: o compost. Por cada 100 quilos de materia orgánica obtéñense uns dez quilos de compost peneirado.
En Pontevedra apostamos pola compostaxe como modelo de xestión global, tratando os residuos orgánicos onde se producen (quilómetro cero) a través de centros de autocompostaxe comunitaria, de autocompostaxe individual, e de recollida no colector marrón, exclusivo de residuo orgánico; e nun futuro, ca planta de compostaxe da Canicouva.
Nin vertedoiros nin incineración
O lixo orgánico debe tratarse onde se produce (‘quilómetro cero’) e non precisa ser depositado nun vertedoiro nin incinerado en plantas específicas.
Aforro na recollida do lixo
Ao xestionar os biorresiduos a curta distancia, non é preciso recoller e transportar os residuos orgánicos e, polo tanto, elimínase este elevado custe económico é ambiental.
Aforro no tratamento
A compostaxe a través de autocompostaxe en centros comunitarios, autocompostaxe individual e plantas comarcais é un modelo máis económico que os actuais se se aplica de xeito global.
Redución de emisións de CO2
Ao non trasladar e non incinerar o lixo orgánico, cada cidadán que composta deixa de emitir á atmosfera uns 155 quilos de CO2 ao ano.
Fertilizante natural
Compostar o lixo orgánico municipal ten como resultado a produción de compost, que pode ser utilizado para mellorar a terra e evita o gasto en fertilizantes químicos.
Mellor reciclaxe
A veciñanza que participa nas campañas de reciclaxe e separa correctamente a parte orgánica mellora tamén as ratios de separación de envases, cartón e vidro.