Plan COMPOSTA
Un paso máis para seguir por diante
É o programa do Concello de Pontevedra para promover a compostaxe dos residuos orgánicos nos domicilios.
Faise de tres maneiras: a través da recollida en colectores especiais que hai nas rúas (recoñeceralos pola súa cor marrón) e mediante o tratamento en composteiros individuais ou comunitarios. O produto resultante é o compost, un fertilizante natural de gran valor.
Para que COMPOSTA chegue a todas as persoas precisamos que formes parte del. Vivas onde vivas, sexa no rural ou no centro urbano, podes compostar.
Sistema avanzado e pioneiro
COMPOSTA supón un paso máis no modelo de xestión dos residuos urbanos do Concello de Pontevedra, que xa é un referente por avanzado e pioneiro. Temos un gran obxectivo: cumprir a Directiva 2008/98/CE do Parlamento Europeo e do Consello, de 19 de novembro de 2008 sobre os residuos, que obriga a que en 2020 a metade dos residuos municipais sexan reutilizados ou reciclados. En 2025, esta cifra debe ser do 55%; en 2030, do 60%; e en 2035, do 65%. Esta normativa foi trasposta, tanto na lexislación estatal como na autonómica.
Como ves é todo un reto, que conseguiremos xuntos e grazas a ti e a túa participación.
A calidade de vida dun lugar tamén se mide pola maneira de xestionar os seus residuos e niso, ao igual que no modelo urbano, Pontevedra é un exemplo.
A participación no programa é voluntaria e completamente gratuíta.
por que participar?
Por varios e poderosos motivos:
- Para axudar na conservación do planeta, que é patrimonio de todos. Compostando reducimos a emisión de gases que se xeran, por exemplo, no traslado das basuras ás plantas de reciclaxe ou incineración.
- Para contribuír á economía circular reducindo a pegada ecolóxica do ciclo de tratamento dos biorresiduos, reducir a propia xeración de residuos e o consumo de fertilizantes externos.
- Para contribuír na reciclaxe do lixo compostando os biorresiduos e transformalos en compost.
composta en tres modalidades
Podes adherirte á que mellor se adapte ás túas necesidades e en función de onde estea a túa casa.
É para ti se vives nun piso do ámbito urbano de Pontevedra e non tes un centro de compostaxe comunitario preto. Para compostar deberás depositar os residuos orgánicos no colector marrón.
Podes sumarte se vives nunha casa do rural de Pontevedra ou da zona periurbana da cidade. É necesario que teñas un pequeno xardín ou finca para colocar o composteiro. Non te preocupes, ocupa pouco e non desprende olores. Todo o contrario! Cando recollas o teu primeiro compost descubrirás un agradable aroma a monte.
É a modalidade que debes escoller se vives en calquera dos puntos onde hai un centro de compostaxe comunitaria. Neles poderás depositar os residuos orgánicos que se xeran na túa casa.
A túa participación é moi importante, porque con ela axudas a protexer o medio ambiente e a seguir mellorando a xestión do lixo no noso concello.
Grazas!
